قانون العقوبات المصري بيعتبر الضرب والاحتجاز جريمة يعاقب عليها القانون، بس هل القانون بيكون فعال لما مرتكب الجريمة يكون من داخل الأسرة؟
في الفترة الأخيرة شوفنا جرائم كتير وصلت إلى إن ستات فقدت حياتها والجاني متحاسبش، كمان عندنا إشكاليات كتير زي: ازاي البنت هتبلغ وهي محبوسة، وأحيانا ممنوعة من أي وسائل اتصال؟ وهل لو راحت القسم هيوافقوا يعملولها محضر ولا هيعتبروه شأن خاص ومشاكل عائلية؟ طب لو القسم وافق يعملها المحضر هتعيش فين لحد ما الإجراءات تخلص؟عشان كده محتاجين قانون موحد ضد العنف في مصر..
مقترح #قانون_مناهضة_العنف_الموحد اتقدم للبرلمان بعد جهد كبير من منظمات ومؤسسات ومجموعات نسوية مصرية، واهتم بأشكال كتير من العنف اللي بتتعرض له الستات خاصةً العنف الأسري، واشتمل على بنود لتجريم الإكراه على الزواج، وتزويج الطفلات، إضافة لتجريم الاغتصاب الزوجي.
خلينا نشوف أهم بنود القانون الخاصة بقضية العنف الأسري:
– لا يجوز التصالح في جرائم العنف ضد المرأة إلا برغبة المجني عليها، وبعد التأكد من عدم وقوع ضغط عليها.
– يحق لكل شخص علم أو شاهد الجريمة أن يقوم بالتبليغ عنها.
– حق الضحايا في طلب تعويض من مرتكبي الجرائم، وتلتزم الدولة بتوفيره للضحايا واسترداده من الجاني.
– ضرورة توفير حماية للمجني عليها من أي تهديد أو عنف خاصة في جرائم العنف الأسري.
– إلزام الدولة بإنشاء مساكن آمنة للنساء، مناسبة وسهل الوصول إليها، وبعدد كافي، مع مراعاة التوزيع الجغرافي.
للتعرف والتوقيع على مشروع قانون مناهضة العنف الموحد من هنا