ليه بنضطر نكتب على السوشيال ميديا عشان ناخد حقنا القانوني؟
تلجأ ضحايا العنف من النساء كثيرًا لاستخدام السوشيال ميديا للنشر عن جرائم عنف تعرضن ليها، وده بيحصل عادة بعد ما بيلجأن للمسار القانوني واللي بيفشل في اتخاذ أي إجراء يحمي الضحايا/الناجيات.
أظهرت دراسة أجراها مركز تدوين لدراسات النوع الاجتماعي، ضمن حملة “لما روحت القسم”، أن 57% من النساء اللي تعرّضن للتحرش لا تثقن في إنه ممكن ياخدوا حقهم من الجناة من خلال القانون، وده بيظهر التحديات اللي بتواجه الستات بسبب صعوبة إجراءات الإبلاغ.
وعلى الرغم من تشديد العقوبات في قضايا العنف الجنسي زي عقوبة التحرش اللي تحولت إلى جناية وعقوبتها الحبس سنتين بدل من سنة، لكن تشديد العقوبات لوحده مش كافي. الأهم منه إن يبقى في آليات تضمن تفعيل القوانين والالتزام بيها، أما عن العنف الأسري فبيكون الوضع معقد أكتر لأن الجهات التنفيذية بتتعامل معاه كشأن عائلي وبيروح ضحيته ستات كتير.
لجوء ضحايا العنف للسوشيال ميديا بقى متزايد جدًا في الفترة الأخيرة، ويبدو إنه بقى السبيل الوحيد قدام الستات اللي بتتعرض لعنف عشان الجهات التنفيذية تاخد الشكاوى بجدية، وده بيخلينا نسأل عن القضايا اللي مابتنتشرش بالشكل الكافي أو الضحية/الناجية اللي مابتقدرش تنشر قصتها.. هل مش من حقهن النظر في قضاياهن وحمايتهن؟
بنطالب بإقرار القانون الموحد لمناهضة العنف ضد النساء في مصر، عشان يحمي النساء من العنف ويضمن عدم إفلات الجناة من العقوبة
#بر_أمان #baraman
