كتابة: مريم الشبيني
خطف الأبناء سلاح بيستخدمه بعض الآباء ضد الأمهات بعد الانفصال وده بيأثر بالسلب على الطفل والأم.
بتحكي أم عن معانتها بعد ما حرمها طليقها من أطفالها لمدة سنة ونص بعد ما خطفهم وحاول يهربهم برا مصر و بعدين رجع بيهم مصر وحبسهم في بيت شبه مهجور.
الحادثة ماتعتبرش فردية، فخلال السنة دي خسرت مريم مجدي حياتها في رحلة بحثها عن أطفالها بعد ما خطفهم طليقها وسافر بيهم ولما سافرت عشان ترجعهم قتلها طليقها.
فعلى الرغم من إن المادة 290 من قانون العقوبات بتنص على إن عقوبة خطف الطفل هي السجن المؤبد إلا إن ده مابيحصلش في حالة كان الخاطف هو الأب لأنه بيعتبر ولي الأطفال فبتقع عليه عقوبة حرمان الحاضن من حقه في الحضانة واللي عقوبتها الحبس لمدة لا تقل عن 6 شهور، وغرامة لا تقل عن 2000 جنيه ولا تتجاوز 5000 جنيه.
خطف الأطفال من أمهاتهم بيحط الطفل والأم تحت ضغط نفسي وأحيانا بيحرم الطفل من حقه في التعليم لأن الأب بيمنع الطفل من إنه يروح المدرسة نكاية في الأم وعشان ماتعرفش توصل له.
الخطف في ذاته جريمة فالمفروض يكون في قانون يحمي الطفل أيا تكن درجة قرابة الخاطف.
#بر_أمان