كتابة: أسما حسين
عن حبس إبراهيم سعيد و”بنت الأصول”!
لاعب الكرة السابق إبراهيم سعيد اتحبس على ذمة 32 قضية بسبب امتناعه عن دفع نفقة بناته ومصروفاتهن، وده بحسب تصريح محاميه نفسه. وبدل ما يكون التركيز على التقصير ده، طلع علينا رجل قانون بمنشور غريب جدًا، بيدافع فيه عن الأب، وبيهاجم الأم اللي طالبت بحقها وحق بناتها.
المحامي قرر ياخد الموضوع في اتجاه عجيب، وبدل ما يلوم الأب اللي تهرب من مسؤولياته، قال: “اختاروا الزوجة الصالحة”!
وكأن الزوجة الصالحة هي اللي المفروض تتحمل، وتسكت، وتربي الأطفال لوحدها، وتصرف عليهم، وماتطالبش بحقها وحقهم، عشان “ماتفضحش” الراجل.
كلام المحامي هو انعكاس للوهم اللي المجتمع بيساهم في الترويج له، علشان يضمن استمرار المنظومة الأبوية، اللي دايمًا بتطلب من الست تصبر وتتحمل، وبتدي الرجل كل الأعذار، وبتحول المسؤولية لفضل، والمطالبة بالحق لفضيحة.
بيوهم الست إنها علشان تبقى “بنت أصول”، لازم تسكت، وتتنازل
وكل ما طالبت بحقها، اتقال إنها بتشوّه صورة أبو عيالها أو “ست مش محترمة”!
بس الحقيقة إن:
خدوا لقب “بنت الأصول”
وإدّوا الستات حقوقهن.
الكرامة والعدل أهم من الألقاب الفارغة.