حد اتحرش بيا لفظيًا ليلة العيد، طلبت النجدة، النجدة كتبت إن البلاغ مشاجرة.
لما وصلنا القسم، أمين الشرطة رفض يعمل المحضر بحجة إن النجدة قالت إن ده مشاجرة، مينفعش أكتب تحرش فضلت لحد الساعة ٢ الفجر في القسم مبعملش حاجة.
اللي عمال يتحرش بيا بعينه في القسم، واللي عمال يقولي “هتباتي في القسم”،
واللي يقولي “هنضربهولك”، واللي يقولي “سُمعتك”، و”معلش متزعليش مني، إنتي لابسة مكشوف برضو”،
واللي يقولي “خدي الدبوس ده اقفلي البلوزة”… حاجات كتيرة أوي سيئة مش فاكرها دلوقتي.
على الساعة ٢ من الضغط وافقت أعمل عدم تعرض، ولما أمين الشرطة كان بيكتبه، عيطت.
ولما شافوني بعيط قالولي: “احنا غلطانيين، احنا خايفين عليكي وعلى مصلحتك”.
في اللحظة دي دخل واحد رتبته أعلى من ظابط القسم (بس مش رئيس المباحث)،
وقام متعصب وقال: “أنا شايفك في الكاميرا بقالك سبع ساعات هنا، طيب يا ستي…”
وراح للمتحرش وقاله: “هتعملها محضر تعدي يا بني؟”
قام قاله: “آه”، فقام الراجل ده مسك دفتر وسجل فيه بنفسه إني دخلت القسم، وقام مشي.
وفجأة الظابط فتح باب كده لأوضة معفنة ومتر في متر، وبيدخلني بيقولي: “هتباتوا هنا النهاردة”.
طبعًا انهارت، بس دخلوني غصب قعدت أخبط على الباب يفتحولي، كان هيجيلي نوبة هلع، مفتحوش إلا تاني يوم الصبح والساعة ٩ اتعرضنا على النيابة، واتصالحت.
#شهادات_حقيقية_لناجيات_من_التحرش_الجنسي
#لما_روحت_القسم
#نسيج_نسوي