رفضت محكمة النقض طعن المتهم شادي خلف على حكم حبسه 3 سنوات في قضية هتك عرض 7 فتيات كان اعتدى عليهن خلال عمله كمدرب تمثيل.
شادي خلف كان اتحكم عليه في فبراير 2022 بالسجن 3 سنوات، لكنه خرج بعفو بعد قضاء نص المدة، المجرم ماكتفاش بالعفو اللي حصل عليه بناء على “حسن سلوكه” شادي كمان كان مقدم طعن على الحكم عشان ياخد براءة، لكن محكمة النقض رفضت الطعن.
قضية شادي خلف بتفكرنا بقضية رجل الأعمال محمد الأمين، اللي أدين فيها بالاتجار بالبشر والاعتداء على فتيات دار أيتام يملكها، القضية بدأت في يناير 2022 بعد ما انهالت الشهادات والبلاغات ضد الأمين بتهم الاعتداء على فتيات قاصرات، والنيابة وجهت له تهمة الاتجار بالبشر والتعدي على 7 فتيات ذكرت النيابة في التحقيقات أسماء 3 طفلات من بينهن.
وانتهت القضية بالحكم على رجل الأعمال بالسجن لمدة 3 سنوات وغرامة 200 ألف جنيه.
الفرق إن محمد الأمين مخرجش بعد نص المدة “حسن سير وسلوك” لأنه توفي في محبسه.
الأحكام دي بتخلينا نتساءل عن نظرة منظومة العدالة للناجيات وحجم الضرر الواقع عليهن، وهل منظومة العدالة شايفة دي عقوبة رادعة أو فترة كافية لتأهيل المجرم عشان يرجع يندمج في المجتمع تاني؟
طول ما العقوبات الخاصة بقضايا العنـف الجنـسي مش رادعة ومش بتحقق العدالة بشكل كامل، هيفضل المجتمع في خطر.