حق مشروط بودكاست
في بودكاست حق مشروط هنتكلم في حقوقنا الجنسية والإنجابية بصوت عالي بعيد عن المعتقدات والخرافات حول أجسادنا .. دايمًا حقنا في الرعاية الصحية كستات حق مشروط، يا اما يتقالنا بطلوا دلع، أو بكرة تتجوزي والتعب يروح، وأحيانًا بنتحرم من العلاج إلا في إطار الحمل والولادة.
هنا حق مشروط بودكاست مساحة نتشارك فيها قصصنا، ونقدم فيها معلومات طبية موثوقة.
أول مرة بريود
في أولى حلقات بودكاست “حق مشروط”، بنبدأ بحوار مهم مع د. ياسمين أبو العزم عن أول مرة بيريود. بنحكي عن التجربة الأولى وتأثيرها على البنت من نواحي نفسية وجسدية، وازاي المجتمع بيسيب البنات يواجهوا اللحظة دي لوحدهم. الحلقة بتتناول دور التربية، غياب المعلومات، وأهمية كسر التابوهات حوالين جسم البنات والبلوغ.
أمومة بالإجبار
قيصرية مش ضرورية
هل اتسألتِ عايزة تولدي طبيعي ولا قيصري؟ هل الولادة القيصرية فشل؟ ولا قرار من حقنا ناخده بإيدينا؟
في الحلقة الخامسة من بودكاست “حق مشروط”، بنفتح ملف من أكتر الملفات المسكوت عنها: تجربة الولادة القيصرية وسط ضغط مجتمعي بيحكم على أجسام الستات واختياراتهم.
سمعنا قصص حقيقية وحكينا عن حقوقنا وقت الولادة، وسألنا: إمتى تكون القيصرية اختيار… مش استسلام؟
إكتئاب الرضاعة
ليه بنحس بالوحدة بعد ما نولد؟
هل اكتئاب الرضاعة ضعف؟ ولا تجربة نفسية محتاجة نفهمها ونتكلم عنها؟ اكتئاب الرضاعة حالة بتواجهها أمهات كتير، تجربة صعبة بيمروا بيها في صمت. بيستنزف طاقتهن ومشاعرهن، لكن الخوف من الوصمة بيخلي طلب المساعدة صعب.
في الحلقة دي، بنناقش مشاعر كتير مسكوت عنها بتمر بيها أمهات كتير بعد الولادة. مع إستشارية دولية للرضاعة الطبيعية، بنفتح موضوع حساس ومهم، ونسأل: إزاي نميز بين تعب الأمومة الطبيعي… واكتئاب محتاج مساعدة؟
جسمي بيقول لأ
هل التشنج المهبلي مجرد عرض جسدي… ولا رد فعل أعمق لمشاعر خوف وألم؟ العلاقة الجنسية مش المفروض تكون مؤلمة.
أوقات الجسد بيرفض العلاقة كرد فعل نابع من خوف، ألم، أو تجربة سابقه لسه سايبة أثر. في حلقتنا السابعة، بنفتح موضوع حساس ومسكوت عنه، بيأثر على علاقات وحيوات كتير. بنسأل: إزاي نفهم الرسائل اللي جسمنا بيبعتها… قبل ما نحكم عليه؟
أجساد تحت الوصاية
هل أصحاب الإعاقات عندهم “حق” في الحب والجنس؟وليه المجتمع بيحط أجسادهم تحت وصاية دايمًا، كأنها مش ملكهم؟ في ختام الموسم من بودكاست “حق مشروط”، بنفتح ملف مهم وغايب عن أغلب النقاشات: العلاقة بين الإعاقة والحقوق الجسدية. بنسأل: إمتى نبدأ نشوف الأجساد دي… مش كحالة؟ لكن كحق؟ وليه التعقيم القسري مش رعاية ولا حماية، إنما عنف ممنهج و انتهاك فاضح للكرامة، و سلب للحق في الاختيار.